Excel

Nodiadau

Siartiau a graffiau

Yn ystod eich cwrs, bydd disgwyl i chi greu amrywiaeth o siartiau a graffiau. Cyn dechrau, dylech nodi'n gyntaf pa ddata sydd angen i chi ei ddewis. Dyma'r categorïau a'r gwerthoedd yn eich tabl.

Yna bydd angen i chi benderfynu pa fath o ddata rydych yn gweithio gydag ef, er mwyn dewis math addas o siart.

Mae graffiau bar a graffiau colofn yn gweithio orau pan fyddwch yn cymharu data mewn amrywiaeth o gategorïau neu is-grwpiau. Gall y barrau fod yn fertigol neu'n llorweddol. Mae uchder neu hyd y bar yn gymesur â'r gwerth.

Mae graffiau llinell yn gweithio orau pan fyddwch yn dangos sut mae gwerthoedd yn newid dros amser. Mae pwyntiau ar y llinell yn symud i fyny ac i lawr wrth i'r gwerthoedd yn y data gynyddu a lleihau.

Mae siartiau cylch yn gweithio orau pan fyddwch yn dangos dosbarthiad neu gyfran y gwerthoedd. Mae cylch yn cynrychioli'r cyfanswm (100% o'r data). Yna caiff y cylch ei rannu'n sectorau sy'n dangos sut mae'r gwerth wedi'i rannu rhwng y gwahanol gategorïau.

Gwallau mewn fformiwlâu

Yn ystod y cwrs, byddwch yn defnyddio ffwythiannau adeiledig yn Excel (SUM, AVERAGE, MIN, MAX ac ati), ond bydd disgwyl i chi hefyd ysgrifennu eich fformiwlâu eich hun. Gall hyn arwain at godau gwall annisgwyl. Gwnewch yn siŵr eich bod yn gyfarwydd â'r gwallau cyffredin ac yn gwybod sut i ddefnyddio'r offer Archwilio Fformiwla (Formula Auditing). Mae'r rhain yn ei gwneud hi'n llawer haws olrhain gwall, yn enwedig os oes gennych fformiwlâu nythog, lle mae eich fformiwla'n cyfeirio at gelloedd sydd eu hunain yn cynnwys fformiwlâu.

#DIV/0!

Gwall rhannu â sero. Mae'n ymddangos os ydych yn ceisio rhannu â chell sy'n cynnwys sero, neu gell wag.

#NAME?

Mae'n ymddangos fel arfer os ydych yn cyfeirio at rywbeth nad yw Excel yn ei adnabod. Chwiliwch am wallau teipio a gwnewch yn siŵr eich bod yn defnyddio ystodau a enwir yn gywir.

#N/A

Gall hefyd olygu eich bod wedi camsillafu rhywbeth, neu fod gwall teipio yn eich cyfarwyddyd. Ond, gan amlaf, mae'n dweud wrthych fod rhywbeth ar goll. Gwiriwch nad ydych yn ceisio cael data o dabl chwilio ar gyfer gwerth sydd heb ei osod.

#NULL!

Gwall arall sydd fel arfer ond yn ymddangos oherwydd gwall teipio. Gwiriwch nad ydych wedi gadael colon allan o ystod, neu wedi teipio'r gwahanydd anghywir.

#VALUE!

Mae'n ymddangos fel arfer os oes problem gyda math o ddata. Gwiriwch nad oes gennych destun mewn cell sy'n disgwyl rhif (O yn lle 0, neu I yn lle 1, yw'r drwgweithredwyr cyffredin).

#NUM!

Dylai eich annog i wirio am gamgymeriadau yn y data mewnbwn. Mae Excel yn ceisio gwneud cyfrifiad amhosibl neu weithio gyda gwerthoedd sy'n rhy fawr neu'n rhy fach.

#REF!

Gwall cyfeirio. Gwiriwch pa gelloedd rydych yn cyfeirio atynt, i wneud yn siŵr nad ydynt wedi'u dileu drwy ddamwain na'u symud i rywle arall.

########

Nid gwall go iawn, ond mae'n ymddangos yn ddigon aml i'w grybwyll. Mae rhes o hashnodau'n golygu bod y cynnwys yn rhy lydan i'r gell. Lledwch y golofn a bydd y cynnwys yn ailymddangos.

Hyd yn oed os ydych yn ddigon lwcus i beidio â chael unrhyw wallau, peidiwch â gadael i'r tawelwch eich twyllo. Profwch eich fformiwlâu bob amser gydag amrywiaeth o fewnbynnau i wirio eu bod yn rhoi'r canlyniad disgwyliedig. Gallai rhan o hyn olygu rhoi gwerthoedd syml y gallwch eu gwirio â llaw.

Defnyddiwch ganllawiau astudio Microsoft i ehangu eich gwybodaeth neu adolygu pynciau y tu allan i'r dosbarth.